2Ti 3 | DOB | STEP | Nuwanuwagu be nuwayo 'ida sabwalena tuta 'ana 'ebe losalowa 'imeemai manuna, 'aene tuta nina 'enaya mwau yauna sida apwesa.

2 Timothy 3

Tuta 'ana 'ebe losalowa manuna.

1 Nuwanuwagu be nuwayo 'ida sabwalena tuta 'ana 'ebe losalowa 'imeemai manuna, 'aene tuta nina 'enaya mwau yauna sida apwesa. 2 Manuna tuta nina 'enaya tomota taudimo manudi sinuwanuwa, be esaesa 'ana yala 'iloemaedi, ta sinuwatu'e be gagasa 'aledi be wate eliya 'aledi. Wate sinadiyao be tamadiyao 'enadi geya'abo siematamatanedi, ta mali tomota 'idi guinuwa bobo'adi manudi nigeya sida lokagutoki. 3 'Idi bubuna guguyoi, 'enega geya'abo si'ate'ate nuwa'ole'ole, ta egewagewana be sogala 'aledi. Gamwa sowala besobeso wate 'aledi, ta bubuna bobo'ana 'ana toe'idi'idiyao, be 4 towasegigi, be to'umalina 'ena siewaiwai, be onalaga 'aledi, be Yaubada geya'abo sioboobobome, ta esi taudimo 'idi gwausowala manuna sinuwanuwa. 5 Tomota nidi sitapwatapwalolo, ta Yaubada 'ina waiwai nigeya sida emisena, 'enega 'idi tapwalolo nina yage besobeso. 'Enega tomota nidi 'adi boda 'ena geya'abo 'ulugulugu. 6 Manuna 'aidi 'ediyega anuwa 'ediya silugulugu iine nidi nigeya 'idi nuwanuwa pa'alidi sabi kaboedi, ta iine nidi simwalatonina 'aene taudi toto'umalidi, ta mali lotoona be mali lotoona soladiya simulimuliyedi, 7 'enega e'ita dumadumadi be dumadumadi 'ana tononoyao, ta 'enega nigeya sawesawediya be e'ita 'ai'aila simwalatoni.

8 Ona'ai'aila, tomotai nidi e'ita 'ai'aila sietalauwalena, nadigega lowa taudi Yanisi be Yamilisi Mosese sietalauwalena. Taudi 'adi 'ita 'atuwa toemisa, ta soladiya kabo be nuwanuwa to'umalina simiyami. 9 Ta ma'etamo yage nidi getedi sida loapwesedi, be mali tomota si'itadi. Nadigega lowa Yanisi be Yamilisi 'idi kabo 'iloapwesena ga tomota si'itena.

Timoti 'ana loina

10 Ta 'oyo ni'atu 'umwalatonigu, 'igu e'ita, be 'igu bubuna, 'igu 'edao, 'igu emisa, 'igu 'alama'i'ita, ta 'igu oboboma, be 'igu toolopa'ala, 11 ta sena nidi Anitioki be Ikoniami be Lisitila 'ediya 'igu miyamwau be 'igu 'elouya tomota 'ediyega yalobediya wate 'umwalamwalatoni. Sena nidi 'ediya yamiyamwau 'ai'aila, ta mwau nidi maibo'adi 'ediyega 'ida 'Inapwana 'i'etoseyegu.

12 Ona'ai'aila, 'eguma 'abo'ada Yesu Keliso taemise, ta tatagwaleda 'ina 'eda bobo'ana 'enaya, ma'etamo miyamwau tomota 'ediyega taloba. 13 Ta wate taudi toto'umalidi be tomota 'adi tokaboyao 'idi to'umalinao sida sinabwa 'ai'aila, manuna Seitani ni'atu 'ikaboedi.

14 Ta 'oyo esi e'ita nidi ni'atu 'uemisedi ga 'umwalatonidiya, 'ediyega 'utatauya, manuna 'abo'ama 'imu toe'itao ni'atu 'umwalatonima 'aene 'ima e'itao nidi wate 'amulimuliyedi. 15 Ta 'oyo tauyo wate 'imu tuta gwamega ga batuwa Buki Tabu 'ina onao 'ana tosawa, ga 'ie'itemu 'aene 'ida emisa Yesu Keliso 'enaya 'ada 'ebe 'etoseyana. 16 Ona'ai'aila, Buki Tabu 'ina onao maibo'adi Yaubada Yaluyaluwana 'enega simai, be ona nidi 'ediyega 'ada e'ita be 'ada guguya be 'ada giepaepalu be 'ida waiwai talobalobadi, 17 Yaubada 'ina guinuwao manudi. Manuna Buki Tabu 'ina onao 'ediyega Yaubada 'igibubuda, be sawesawedaya 'ina guinuwao yaudi bobo'adi taguinuwedi.